Nektarströndin sem gleymdist!

 

Heildarvegalengd:   2980 km

Hjólað í dag:                 85 km

Hvert hjólað:          Half Moon Bay CA - Santa Cruz CA

Hjólað í heild:           2005 km

 

Hann bograði yfir hjólið sitt þegar við hjóluðum framhjá í morgun. Skömmu síðar náði hann okkur og veifaði þegar hann fór framhjá - þetta var skeggjaður maður á áttræðisaldri á langferð. Töskurnar á hjólinu hans báru þess vitni. Nokkru síðar stoppuðum við til að borða nesti og hann birtist þá og settist hjá okkur. Gamli maðurinn reyndist vera frá San Diego. Hann var í ca 10 daga ferð niður með ströndinni - dóttir hans hafði keyrt hann upp að Tomales flóa fyrir ofan San Francisco og síðan ætlaði hann að hjóla sem lengst á þessum tíu dögum þar til hún kæmi aftur og næði í hann. Hann reyndist vera þaulvanur hjólamaður. Hafði oft hjólað meðfram Kyrrahafsströndinni. " Þetta verður erfiðara með hverju árinu," sagði hann og glotti. " Það gerir aldurinn." Fyrir löngu hafði hann hjólað þvert yfir Bandaríkin á 5 mánuðum. "Þetta er það besta sem ég haf gert á ævinni," sagði hann með sannfæringarkrafti. Hann benti okkur á kortinu á nektarströnd sem var framundan, en þó ótrúlega megi virðast þá gleymdi ég að kanna málið nánar þegar til kom! Trúi því hver sem trúa vill. Nokkru síðar kvaddi hann - gamli maðurinn ætlaði að dvelja um nóttina á hosteli við lítinn vita við Pigeon Point. Við héldum hins vegar áfram næstu 50 kílómetrana til Santa Cruz. Leiðin var nokkuð bein meðfram ströndinni - það eina sem gerði okkur lífið leitt í dag var vindurinn sem aldrei þessu vant var beint í fangið á okkur. Nánast engin þorp voru á þessari 85 km leið - aðeins ein tómleg bensínstöð þar sem afgreiðslumaðurinn var upptekinn við að fylgjast með Hollendingum tryggja sér sæti í úrslitum HM. Nokkuð var af fólki við fjölmargar litlar strendur á leiðinni þrátt fyrir að hitastigið hafi varla verið meira en 15C - auk vindsins. Santa Cruz er hins vegar þokkalega stór borg - hér búa ca 60 þúsund manns. Á morgun ætlum við síðan að heimsækja Clint Eastwood... 

Athugasemdir

[Hlynur (IP-tala skráð) 7.7.2010 kl. 07:50]

Sé að ferðalagið gengur vel hjá ykkur. Hvernig er hægt að klikka á því að fara ekki á ströndina, þetta er algert dómgreindarleysi hjá ykkur að svífa fram hjá þessari perlu. :)

Til hamingju með stórafmælið Kalli, ég er ekki frá því að þú yngist með hverju árinu.

Gangi ykkur vel með síðustu km. Fylgist með ykkur.

[Steinn (IP-tala skráð) 7.7.2010 kl. 21:41]

Ferlegt að klikka á nektarströndinni.

Annars gaman að fylgjast með ykkur og stór áfangi að vera búin með 2/3 af leiðinni. Til hamingju með árin 50 Kalli. Ég bíð svo spenntur eftir að hitta ykkur í Lindarberginu og fá ferðasöguna beint í æð.