Í erfidrykkju með kúrekum

 

Heildarvegalengd:  2980 km

Hjólað í dag:            92 km

Hvert hjólað:         Bandon OR - Gold Beach OR

Hjólað í heild:        1119 km

 

"Þetta er ægilega huggulegur staður. Fullt af fólki með kúrekahatta og svoleiðis," sagði Linda þegar hún hafði stungið nefinu inn um dyrnar á litlum óhrjálegum veigingastað í Port Orford, eina þorpinu sem var á þessari tæplega 100 km leið milli Bandon og Gold Beach. Við létum til leiðast og lögðum hjólin frá okkur og fórum inn með hjólahjálmana á hausnum. Hún hafði rétt fyrir sér. Staðurinn var fullur af kúrekum með hatta og í köflóttum skyrtum. Einn þeirra kom til mín og sagði afsakandi að utanaðkomandi gestir yrðu að sitja í ákveðinni gluggaröð. Ég leit spyrjandi á hann. " Er einhver fundur í gangi," spurði ég og þurrkaði svitann framan úr mér - enda heitt í veðri og sólin skein fyrir utan. "Ekki beint," sagði kúrekinn með sorgarsvip. " Þetta er erfidrykkja. En ykkur er auððvitað velkomið að vera og fá að borða," bætti hann strax við." Einhvern veginn passaði klæðnaðurinn og hjálmarnir ekki við stemmninguna og við hrökkluðumst út. Það var þá sem við tókum eftir myndum sem búið var að hengja upp á veggi af hinum látna. Við fórum yfir götuna en þar var hinn veitingastaðurinn í þessu litla þorpi þar sem örfá hundruð bjuggu. Þar var lítið að gera enda allir þorpsbúar í erfidrykkjunni. Einn eigandinn sagðist síðast í morgun hafa verið að diskútera við félaga sinn eilífðarspurninguna - af hverju heitir Ísland Ísland og Grænland Grænland. Ég útskýrði fyrir honum blekkingarvef gömlu víkinganna.

Fólk heldur gjarnan að vesturströnd bandaríkjanna sé mjög þéttbýl. Því fer fjarri. Maður getur nánast hjólað heilu dagana án þess að koma í svo mikið sem eitt þorp og og oft eru tugir kílómetra milli þess sem maður sér litla sjoppu við vegakantinn. Náttúrufegurðin en hins vegar ótrúleg á leiðinni - drifhvítar strendur, klettar, há tré í fjallshlíðum og dölum og allt þar á milli. Þannig var dagurinn í dag. Við stoppuðum oft til að taka myndir - glampandi sól og hlýtt og lítil umferð. Fórum strandlengjuna út úr Bandon í morgun sem var ægifögur, síðan tóku við engi með bóndabæjum næstu 20-30 km áður en við komum í fyrrnefndan Port Orford. Þar var önnur falleg strönd. Síðustu ca 40 km dagsins voru eins og póstkort - útsýni yfir ströndina oft tugir kílómetra. Komum til Gold Beach (1800 íbúar) tæpum 9 klst eftir að við lögðum af stað. Staðurinn stendur tæplega undir nafni - lítil strönd og ekkert gull sjáanlegt en ágætis bryggja með einum togara við festar. Fáir á ferli á Ellenburg Avenue, aðalgötunni á þessu laugardagskvöldi - tveir strákar spiluðu á gítar á bílaplaninu fyrir framan einu matvöruverslunina í bænum - tvær stelpur hlustuðu á. Það var verið að búa til stemmningu. Í dag, sunnudag, er frídagur hjá okkur. Reyni að setja inn myndir, en bæði er netsambandið lélegt hér og eins er moggabloggið ekki mjög myndavænt.

 

 

 

Athugasemdir

[Eva Harpa (IP-tala skráð) 21.6.2010 kl. 21:42]

dí, hvað ég hefði viljað vera fluga á vegg þegar þið föttuðuð að vera komin í efiðdrykkju hjá einhverjum kúreka í spanexgallanum og með hjálma híhíhí, hefð borgað hálfan handlegg fyrir það. Gangi ykkur rosa vel. Knús frá Glitvöllum

[Haukur Magg (IP-tala skráð) 21.6.2010 kl. 22:27]

Hæ hæ

Ef þið eigið í brasi með myndir þá er Picasa frá Google alveg málið. Það er ókeypis og hangir saman með gmailinu. Það er rosalega einfalt að hlaða upp myndum með því og svo getið þið þá linkað beint úr textanum eða haft link sér til að vísa inn á albúmið ;) Hér er mitt albúm http://picasaweb.google.com/haukur.bakari

og hér er tengill inn á heimasíðu picasa http://picasa.google.com/

Kv. Haukur